مقال قديم لى من عامين (التطرف الدينى فى مصر وصلنا لطريق ســد )

اتمنى إن كلامى ده يوصل للجميع بجد لإنى بشوف مهازل بتكتر كل يوم عن التانى بشكل غريب وغبى , وللاسف اللى بيحصل دلوئت هيأثر علينا بعدين ده لو ماكنش ماثر فينا
الموضوع بجد بئالى فتره بفكر إنى اكتب عنه وإنهارده بس قولت لازم اطلع كلامى للحياه عشان الناس تقراه , ويشوفوا إحنا وصلنا لإيه وياترى لصالح مين وعشان إيه ؟




مش عارفه فى ايه وحصلنا ايه
انا ساعات بقعد افكر مع نفسى وافتكر كلام قاله ليا بابا وقالته ليا ماما عن الناس زمان كانوا بيحبوا بعض وقلبهم على بعض , المسلم مع المسلم , والمسيحى مع المسلم
ماكنش فى حاجه اسمها مسلم ومسيحى , كان فى جارنا وجارتنا , كان فى تسامح وهدوء , حتى الاعياد كنا بنحتفل باعياد المسحين والمسيحين يحتفلوا معانا باعيادنا
وحتى فى حرب اكتور 1973  حاربنا سوا وطلعنا سوا وكان شعارنا "الهلال مع الصليب" كنا بنمسك ايد بعض وبنخاف على بعض اوى , وكان عدونا واحد بس
اتكاتفنا وحاربنا العدو وانتصرنا عليه , والمسلم كان حزين على جاره المسيحى الشهيد , والمسيحى كان حزين على جاره المسلم الشهيد , لكن دلوئت فى عصر المفروض
انه عصر التقدم والعلم والرقى انحدرنا للاسفل وبئينا ناس مابتفهمش وفكرنا اصبح متقوقع عقيم , كل اللى بنفكر فيه هو العدا لصاحب الديانه المعاكسه لينا ومش عارفه ايه السبب؟
او هناخد ايه حتى من العداء ده ؟ سؤال حيرنى وبفكر فيه ومش لئيتله جواب إلى الأن





شيوخ الفضائيات وجهلنا السبب الرئيسى
فى اخر عشر سنين  2000 الى 2010 انتشر مايسمى بالتشدد الدينى , وانتشرت الشعارات الهادمه المبنيه على الجهل والغباء , وازدهروا شيوخ الفضائيات ولمعوا ذى نجوم السيما
وعشان بيقولوا الله والرسول انساقنا وراهم لاننا بكل صراحه احنا ماعندناش ثقافه دينيه ولا ثقافه عامه تؤهلنا إننا نفكر بالمنطق والعقل او إننا ناخد الدين من مصادر موثوق منها وفيها , وبئينا نردد
كلامهم وشعارتهم الهادمه للبلد وحقوق الانسان , وبئينا اكتر شراسه مع اصحاب الاديان الاخرى وبئينا نشمئز لو سمعنا او شوفنا شخص غير مسلم نذمه ونسبه ونشتم عليه قدامه او من وراه
بالله لو كنا عندنا دين وبنعرف ربنا كنا هنغتاب الناس؟ او نطلع فيهم البلاوى؟ اما احنا كويسين ومؤمنين اوى كده مش كنا اتعاملنا بحديث الرسول صلى الله عليه وسلم وبمبادىء دينا السامحه
"المسلم من سلم الناس من لسانه ويده"





الجهل والغباء اخرته بلاء
ومن فتره قريبه اوى سمعنا عن حوادث فتنه وطوائف وتطرف دينى بين المسلمين والمسيحين , ووصل بيهم الامر لقتل بعض  وان الناس الغلابه اللى بتشتغل اليوم بيومه عشان ياكلوا ويربوا ولادهم
انهم يسيبوا شغلهم ويروحوا يقفوا بالسواطير والسكاكين قدام بعض عشان كل واحد فيهم  ينصر دينه سواء مسلم او مسيحى , وطبعا المسيحى حاسس بظلم واضطهاد فيعمل ايه يرد على المسلم
بنفس الطريقه وهلوم جرا , ولو بصينا للسبب الاول والاخير فى الموضوع ده كله هو كلام معظم شيوخ الفضائيات اصحاب "الامر بالمعروف والنهى عن المنكر " ومن راى منكم منكر فليغيره
على اساس اننا عايشين فى غابه واهو من سبيل الجهاد فى سبيل الله وانهم ينولوا شرف الشهاده فى الجهاد, ومن الجهاد اللى شجع الناس على المبادره "حادثه اسامه بن لاند "وضربه لبرج امريكا
وطبعا صوره الاسلام اتهزت اوى ووصل للعالم كله ان الاسلام دين الارهاب والدليل اهو , وغير كده كمان المصيبه الكبيره ان من بعد ضرب البرج الاسعار ولعت والمعيشه بئت صعبه اوى
يعنى موت وخراب بيوت





فين حقوق الانسان وحريه العقيده؟
هو ليه كل بنى ادم شاغل نفسه بغيره وعاملنا فيها إلهّ وبيحكم ويتحكم فى خلق الله سواء بالفعل او القول , ومين اصلا اداهم الحق انهم يكفروا الناس ويدخلوا فى حرياتهم الشخصيه بكل غباء؟
انا بسال نفسى سؤال وبقول هل ياترى البنى ادمين دول عملوا كل شىء كويس وضمنوا الجنه عشان يحاكموا خلق الله؟ ولا ياترى الموضوع ده راجع لمرض نفسى جواهم او انهم ناس فاضيه
او انهم نصبوا نفسهم كمندوبين من ربنا على خلق الله والعياذ بالله؟او انهم عواطليه مش لائيين شغل؟
سبحان الله ماكل انسان حر فى عقيدته مسلم فالحمدلله على اسلامه مسيحى فالحمد لله مقتنع بدينه وديانته , وانتم مالكم؟ , والشىء اللى بيستفزنى انهم شاغلين بالهم باللى اسلم واللى ألحد
واللى مش عارف إيه؟ وعاملين مظاهرات فى الشوارع بيطالبوا بحريه العقيده خاصتا بعد موضوع "المسيحيات اللى اسلموا" طيب هى عاوزه تسلم هى حره انتم مالكم؟ هو عاوز يلحد وانتم
مالكم هو انتم اللى هتحاسبوا الناس؟ إلا ماشوفت بنى ادم فيهم عمل مظاهر ليها فايده كلها مظاهرات خايبه بدل على عقليتهم وثقافتهم السفيهه... ودى صور من مظاهره احتجاجيه كانت فى
اسكندريه بيطالبوا بفك اسر "كاميليا شحاته" الفتاه المسيحيه اللى اسلمت .. الصور بتحكى عن نفسها


*هذا المقال قبل حادث تفجير الكنيسه وقتل المسيحيون