إذاى تربى البنت وإذاى تربى الولد ؟

إذاى تربى البنت  وإذاى تربى الولد  ؟
تربيه الولد :_
من صغره الاب بيفرح اوى طبعاً جاله ولد عشان يشيل اسمه واسم العيله الكريمه ويخلد الاسم ليوم القيامه , على اساس انه ضمن
انه هيعيش ويخلف ويتجوز , ويخلد اسمه خلاص ضمن كل شىء , وطبعاً الام مبسوطه انها بسطت سبعها"جوزها" هههههه
وجابتله الولد وكمان الناس تنده لها بأم الواد , وكمان اهى ضمنت انه ولد مش هيجيبلها العار ومهما يعمل اسمه ولد مش بنت يعنى عار ماشى على الارض وقله قيمه وحمل تقيل على قلبها هى وجوزها .
ويكبر الولد شويه ابوه يعمله معنى الرجوله , وطبعا معنى الرجوله انه لما يشوف موزه حلوه فى الشارع يعاكسها وابوه يطير من الفرح ان ابنه كبر وبيعاكس المزز فى الشوارع , ويفهمه انه راجل يعمل كل شىء انما اخته لاء ماتعلمش لانه حرام وعيب وغلط لانها عار للعيله ولازم نكبت على نفسها لحد مانشوفلها عريس غبرا تتجوزه ونسترها ونخلص منها .
ويكبر الولد شويه وشادد حيله ونفسه فى البيت على اخته يطلع ويخرج براحته مهو راجل يعاكس بنات الناس مهو راجل يتكلم فى البيت ويعلى صوته ويضرب اخته طبعا من حقه مهو راجل , ممنوع اخته تكلم ولد عيب وحرام , ممنوع اخته تتاخر برا البيت او يكون لها زمايل ولاد تحب لاء تتنفس لاء تقول اشتغل لا عيب وحرام هى ناقصها ايه اكل شرب فلوس؟ عيب عيب عيب حرام حرام حرام لازم تلبس حجاب عشان عيب وحرام وعشان كلام الناس اللى اصلا بيتهم بلاستيك , لازم تنكتم خالص مش يطلع لها نفس ولا تقول اه او لاء هى تاكل وتشرب وتتعلم وبعدين تقعد فى البيت لحد مانشوفلها عريس يسترها على اساس انها مش مستوره او ان اللى بيستر مخلوق اسمه راجل مش ربنا , لو ماعجبهاش العريس تاخد على دماغها , لو قالت اطلق نصيبه سوده البنت اتجنينت وعملت شق فى الاسلام عيب عيب عيب حرام حرام حرام هتدخلى النار وارجعلى يامرتده لدينك.



تربيه البنت :_
لما الاب يسمع ان مراته جابتله بنت يبتسم ابتسامه صفرا ويعمل نفسه راضى بقضاء الله وامره ويقول قدام الناس ان البنات رزق ودنيا  وهو جواه بيندب حظه وبخته , بش لازم يعمل قدام الناس انه بتاع ربنا وراجل مودرن , ويقول فى نفسه يادى الحوسه اللى عملته فى حياتى هشوفه فى عملى الاسود اللى هى بنته , لازم من البدايه اكسرلها ضلع واقطم رقبتها واخليها مجرد كائن عايش وخلاص لحد مااسترها بعريس وربنا يستر لحد ماتكبر , وتكبر البنت شويه ابوها يفطم امها باللى هتعلموا مع البنت ويقولها مش ناقصين بلاوى وعار وفضايح , الام تبرمج بنتها من البدايه على انها لجوزها , وعلى العيب والحرام من وجهت نظر المجتمع وانها ناقصه عقل ودين وانها عوره وغلط البنت تتكلم او تعبر عن رائيها غلط انها تعلى صوتها لانه عوره غلط انها تقول اه ولاء غلط انها تفكرغلط غلط غلط حرام حرام حرام , وعشان يكمل الادب والتدين تاخدها امها تعملها ختان عشان تبئى خشبه ماشيه لا احساس ليهاولا كرامه فيها , وطبعا تحت علم ابوها الفاضل المحترم اللى بيحبها , وتكبر البنت شويه وتقول عاوزه اشتغل بعد التعليم اخوها يقولها شغل ايه انتى هتفضحينا وامها تقولها البنت لبيتها وابوها يقولها انتى خرجتى عن طوعى , وتتكسر البنت وتتذل وترضى بالامر الواقع وتاخد على دماغها وتتجوز اى عريس عشان تتستر وعشان ماحدش يقولها ياعانس , وعشان ربنا يحبها والناس ترضى عنها وتدخل الجنه.


الحقيقه المره:_
انا لخصت كلامى وفى كلام اكتر من كده لو قعدت اكتبه مش هينتهى ابداً , بس اللى واجعنى اوى ان الاهل هما اللى بيصنعوا ولادهم وبناتهم صنعوا شاب فاسد متحكم , وصنعوا بنت بلا راى او هويه , اقنعوا البنت ان الدين نزل للمراه لانها عار ويجب ان يحميها , اما الرجل فهو رجل لاغبار عليه , واقنعوها ان العفه فى الجسد وليست فى الاخلاق والنوايا , وان الرجل لا عفه له لانه راجل بحكم المجتمع لايحمل عفه ودليل كلامى بيظهر فى الشوارع اكتر , تحرشات ومعاكسات ونظرات شهوانيه من الاساس هى تربيه وضعوه الاهل فى نفس ابنهم , اما البنت فهى الضحيه فى الاول والاخر " نفسى بنت تقول لاء أو اه على اى حاجه نفسى ى هدى شعراوى  جديده " انا حزينه فعلا ليه بنسكت ومانقولش لاء بنتكلم ونكتب ونتخانق لكن بلا جدوى او فايده؟