برمجه الام لبنتها كانت قبل برمجه الحاسب الالى بكتير

برمجه الام لبنتها كانت قبل برمجه الحاسب الالى بكتير  

الموضوع ده مش للسخريه بس انا حبيت اطلع اللى جوايا واللى بشوفه , لانى بجد الكلام واقف فى زورى اوى
وطبعا مش كل البنات بينطبق عليهم الاوصاف دى بس الاغلبيه العظمى ومش هقول نسب بينطبق عليها الكلام والاوصاف دى
ويمكن كلنا مرينا بالكلام ده بس فى بنات عرفت تفكر صح وتختار مستقبلها وحياتها بنفسها وفى بنات استجابت للبرمجه


فتره الطفوله

من وهى صغيره امها بتبرمجها على إنها ام وكل اللعب بتاعتها هتكون عرايس , وخدى ياحبيبتى شيلى ده النونو بتاعك
والبنت تشيل النونو وتلعب بيه وتأكلها وتشربها وتلبسها , والمشكله الكبيره ان المصانع اللى بتصنع لعب الاطفال عملت
عرايس بتتكلم وتقول ماما وعملت مع كل عروسه هدوم واكل عشان البنت تتعامل معاها كأنها أم فعلا , بصراحه انا بحس
ان الموضوع مش طفولى خالص , وان الموضوع مش مجرد لعبه الموضوع ان الاهل عاوزين يوصلوا للبنت دى انها فى
يوم من الايام هتكون ام ولازم ولا بد يكون عندها بيبى , يعنى ذى ماتقول.. برمجه لعقلها من صغرها



فتره المراهقه

وتكبر البنت شويه وتظهر عليها معالم الانوثه .. وتبتدى البرمجه تشتغل وتبتدى امها تعلمها من صغرها ان البنت لجوزها ولبيتها
فتبتدى البنت دى تشتغل على نفسها عشان تلفت نظر الولاد اللى فى المدرسه معاها لو كانت مدرسه مشتركه .. او تلفت نظر
الولاد اللى فى الدروس الخصوصيه معاها .. وتبتدى تفكر فى موضوع حب وجواز , واللى بستغربله انها بتفكر فى الكلام ده
من سنه 12 سنه مش حتى من سن ال17 , وتبتدى تقلد الكبار لان اهلها وخاصتا امها اوحت لها انها خلاص كبرت بشكل غريب
وطبعا امها مش عاجبها تقليد بنتها  للغير , وهى مش عارفه انها السبب فى كل اللى بيحصل ده



فتره الشباب

وتكبر البنت اكتر واكتر وتدخل الكليه , وياريتها مادخلت  دى لا ثقافه ولا فهم ولا اى حاجه فى اى حاجه هى داخله عشان تاخد
شهاده وعشان وتقعد فى  قلب البيت ذى ما امها قالت لها , وبالمره تشوفلها عريس اياً كان مش مشكله  اصل امها قالتلها ضل راجل ولا ضل حيطه وبنات كتير بسمعهم بنفسى بيقولوا احنا مش هنشتغل احنا هنتجوز ونقعد فى البيت , حتى اللى قالت انها هتشتغل مع اول فرصه عريس قالت بلا شغل بلا قرف العريس احسن هو اصلا فى شغل





فتره ما بعد الكليه

بعد ما البنت تخلص الكليه وتقعد فى البيت تبتدى تقلق من نفسها انا لسه واذاى ماتجوزتش لحد دلوئت ؟!دا بنت خالى اتجوزت وانا اكبر منها بشهرين اذاى دة يحصل !, وتبتدى امها تاخدها معاها فى افراح وتلبسها وتعمل ميك اب وتخليها تلف لفه فى الفرح عشان .. عنتر ابن شداد يشوفها ولو عنتر شاف واحده قريبتها او صحبتها تبئى مشكله , امها تقولها ياعينى يابنتى  كل البنات اتجوزوا إلا انتى , انتى فيكى ايه بس انتى اكيد معمولك عمل مربوط فى رجل نمله , وتبتدى البنت تقلق اكتر كده مش هتجوز انا دلوئت سنى 22 سنه وبعدين ده سن خطر وكده وحش عليا وامى قلقانه عليا ,طيب مااجرب العريس بتاع طنط سوسو جارتنا اهو عريس وخلاص واسمى هتجوز وجوازه والسلام وتشوف عريس طنط سوسو , هو شكله مش كويس ومالو مش بالشكل , ومش ستايل ومالو مش مشكله , وبتاع مامته عادى وفيها ايه يعنى المهم انه عريس وخلاص واتستر وخلاص انا غيرى عندهم عيال , خلاص انا موافقه يابابا . طلاما ان ماما بتقول انه كويس وغنى  هو حد  لائى عرسان اصلا انا ابوس ايدى وش وضهر .. احمدك يارب





فتره بعد الجواز
 
ايه الراجل ده انا مش طيئاه , انا ايه خلانى اتجوزوا ده ماكانش ليا , لا انا عاوزه اطلق , وطبعا امها تقولها كالعاده الكلمه الشهيره
تطلقى!! عيب يابنت الناس يقولوا علينا إيه؟ ماتقوليش كده تانى البنت مش طيئااه ومش عاوزه تجيب اطفال من البنى ادم اللى ادبست فيه ده , امها تئولها لاماتقوليش كده الاطفال احباب الله وبعدين البنت ربنا خلقها عشان تخلف وتملى الدنيا عيال ... على اساس ان الدنيا مش مزحومه والحياه بمبى , وتقرر البنت انها تكون ام ذى ما امها فهمتها , وتجيب البنت بنت , وتبرمجها من صغرها على البرمجه الالكترونيه اللى اتبرمجت عليها زمان ,وتديها العروسه وهالوم جرا.. عرفتوا بئى اننا اول ناس اخترعوا وعرفوا البرمجه قبل مانعرف برمجه الحاسب الالى :)